एजेन्सी : फिफा विश्वकपकौ २२औं संस्करण कतारमा आइतबार राति देखि सुरु भएको छ । एक महिनासम्म चल्ने विश्वकपको कतारस्थित अल बायत स्टेडियममा भब्य उद्घाटन सहित सुरु भएको हो ।
उद्घाटन सत्रमा कतारी संस्कृतिसहितको झाँकी प्रस्तुत गरिएको थियो । कतारका राजा शेख तामिम बिन हमाद अल थानीले औपचारिक सम्बोधनसहित विश्वकपको उद्घाटन गर्नुभयो ।
४० मिनेट चलेको उद्घाटन सत्रमा विश्व प्रसिद्ध दक्षिण कोरियाली ब्यान्ड बिटीएसका जुङ कुक र कतारी गायक फाहाद अल कुबाइसीको प्रस्तुतिले उद्घाटन सत्रलाई तताएको थियो ।
उद्घाटन अवसरमा विश्वकपमा सहभागी ३२ राष्ट्रको संस्कृति, विगतका आयोजक देश र कतार विश्वकपका स्वयंसेवकको प्रतिनिधित्व सहितको प्रस्तुति देखाइएको थियो । प्रसिद्ध कलाकार मोर्गन फ्रिम्यान तथा स्थानीय कलाकार घनीम अल मुफ्ता र दानाले आशा, एकता र धैर्यताबारे फरक पस्तुति दिनुभएको थियो ।
उद्घाटन समारोहमा कतार विश्वकपको छुट्टै मस्कट पनि सार्वजनिक गरिएको थियो । कतारले सन् २०१० मा विश्वकप आयोजनाको अधिकार पाएपछि विश्वकप सफल पार्न पूर्वाधार लगायत क्षेत्रमा ठूलो लगानी गरेको थियो ।
जसका लागि कतारले सातवटा अत्याधुनिक नयाँ रंगशाला, होटल, सडकलगायत पूर्वाधार निर्माणमा ठूलो लगानी गरेको थियो । हालसम्मकै सर्वाधिक धेरै लगानी भएको विश्वकपका लागि कतारले दुई खर्ब २० अर्ब अमेरिकी डलर खर्च गरेको छ ।
कतारले उद्घाटन समारोहमा स्टेडियमको तापक्रम औसत २५ डिग्रि सेल्सियसमा सीमित राख्ने प्रविधिको समेत जडान गरेको छ । मध्यपूवी एसियाले पहिलो पटक विश्वकप आयोजना गरेको हो ।
यसअघि सन् २००२ को विश्वकप जापान र दक्षिण कोरियाले संयुक्त रुपमा आयोजना गरेका थिए । कतार विश्वकपमा दुई सय ११ देशबाट छनोट भएका ३२ टोलीको सहभागिता रहेको छ ।
कतारले आयोजकको हिसावले सहभागिताको मौका पाएको हो । विश्वकपमा सहभागी टोलीलाई आठ समूहमा विभाजन गरिएको छ । सहभागी टोलीबीच फाइनलसम्म कूल ६४ खेल हुनेछन् ।
कतार विश्वकपको विजेता टोलीले ४२ मिलियन अमेरिकी डलर (करिब ५ अर्ब ४५ करोड रुपियाँ) पुरस्कार पाउनेछ । यो रकम सन् २०१८ को २१औँ संस्करणभन्दा चार मिलियन अमेरिकी डलरले बढी हो ।
विजेताले नगदसहित सुनको जडित ६.१ किलोग्रामको आकर्षक ट्रफी हात पार्नेछ । यो सक्कली ट्रफी रनिङ ट्रफी हो । कुनै पनि देशले लगातार तीन पटक विश्वकप जितेमा मात्र सक्कली ट्रफी सँधैका लागि लैजान पाउने छ ।
यस्तै उपविजेताले ३० मिलियन अमेरिकी डलर, तेस्रो हुनेले २७ मिलियन अमेरिकी डलर र चौथो हुनेले २५ मिलियन अमेरिकी लडर पुरस्कार पाउनेछन् ।
