हरिवन – सर्लाहीको हरिवन र मिलनचोकमा शनिबार भएको बेग्लाबेग्लै दुर्घटनामा ६ जना घाइते भएका छन् ।
पूर्व पश्चिम राजमार्ग अन्तर्गत बागमती नगरपालिका १ मिलन चौकमा पूर्वतर्फ आउँदै गरेको बा ८९ प ५९९६ नम्वरको मोटरसाइकललाई पछाडिबाट आइरहेको ना २ च ३९६० नम्वरको कारले ठक्कर दिँदा कार अनियन्त्रित भइ विपरीत दिशाबाट गइरहेको प्रदेश २–०३–००२२ प ७९९५ नम्वरको स्कुटरलाई ठक्कर दिँदा ३ जना घाइते भएका छन् । दुर्घटनामा स्कुटर चालक हरिवन ८ का ३७ वर्षीय धनबहादुर गोले र पछाडि सवार सोही ठाउँका ३२ वर्षीय भिम लामा गम्भीर घाइते भएका छन् ।
दुवै घाइतेलाई हेलिकप्टरबाट थप उपचारका लागि काठमाण्डौं लगिएको छ । सो दुर्घटनामा घाइते मोटरसाइकल चालक बागमती १ का ३० वर्षीय सुकमान तामाङको सर्लाही जीवन अस्पताल सुकेपोखरीमा उपचार चलिरहेको छ ।
यस्तै, हरिवन नगरपालिका १ भोक्टेनीस्थित भित्री सडकमा बोलेरो गाडीले मोटरसाइकललाई ठक्कर दिँदा ३ जना घाइते भएका छन् । दक्षिणबाट उत्तरतर्फ गइरहेको ज १ च १७१९ नम्वरको बोलेरो गाडीले उत्तर तर्फबाट आइरहेको ना ५३ प ९७९८ नम्वरको मोटरसाइकललाई ठक्कर दिँदा हरिवन ८ डाँडाटोल बस्ने मोटरसाइकल चालक २२ वर्षीय नवीन राईन, पछाडि सवार १८ वर्षीय विज्ञान घिमिरे र १८ वर्षकै साहिल राणा गम्भीर घाइते भएका छन् ।
घाइते तीनै जनालाई थप उपचारका लागि वीरगन्ज लगिएको छ । यि ३ जना घाइतेलाई पनि हेलिकप्टरबाट काठमाण्डौं लाने प्रयास गरेपनि साँझ परिसकेकाले हेलिकप्टर आउन नसकेको हरिवन प्रहरीले जनाएको छ ।
बोलेरो चालक फरार रहेकाले प्रहरीले खोजी गरिरहेको छ ।
