निराज रानाभाट , काठमाडौं : गत असोजको पहिलो साता हुने भनिएको ‘ दोश्रो क्वालिटी इन्टरटेनमेन्ट अवार्ड २०७९ ’ अब यहीँ कार्तिक २१ गते , साेमबार , राजधानी काठमाडौंको जमलस्थित राष्ट्रिय नाच घरमा हुने भनिएको छ ।
यस अघि यो अवार्ड रशियन कल्चरल सेन्टरमा हुने भनिएकोमा अब यसको ग्रान्ड फिनाले काठमाडौंको जमलस्थित राष्ट्रिय नाच घरमा आयोजन हुने आयोजक संस्थाले जनाएको छ ।
यो अवार्डको गत भदौमा मनोनयन सार्वजनिक गरिएको थियो । सोही कार्यक्रममा यो अवार्ड असोजको पहिलो साता आयोजना गरिने घोषणा गरिएको थियो , तर त्यतिबेला काठमाडौंमा डेंगोको महामारी फैलियो । आयोजक टिम समेत डेंगोबाट प्रभावित भएपछि यो अवार्ड त्यतिबेला स्थगित गरिएको थियो । अब भने कार्तिक २१ गते अवार्ड प्रदान समारोह गर्न लागिएको आयोजक संस्था क्वालिटी फिल्मस्का अध्यक्ष उमेश गुरुङले बताएका छन । उनका अनुसार यसपटक विभिन्न ४० विधामा यो अवार्ड प्रदान गरिने भएको छ । चलचित्र , गीत , संगीत , म्युजिक भिडियो , फेशन तथा मोडलिङका विभिन्न विधामा यो अवार्ड प्रदान गरिने भएको छ ।
यसपटक अवार्ड समारोहमा अवार्ड प्रदानसँगै विभिन्न व्यक्तिहरुलाई राष्ट्रिय सम्मान पनि गरिने भएको छ । अवार्ड समारोहमा ध्वानी सम्पादक दिका गुरुङलाई लाईफ टाईम एचिभमेन्ट अवार्डबाट सम्मानित गरिने छ । ३ दशकभन्दा लामो समयदेखि ध्वानी सम्पादकको रुपमा सक्रिय रहेका कारण उनलाई लाईफ टाईम एचिभमेन्ट अवार्ड प्रदान गर्न लागिएको पनि अध्यक्ष गुरुङले बताए । यस्तै , यो वर्ष क्वालिटी इन्टरटेनमेन्ट पत्रकारिता पुरस्कार राजधानी दैनिकका कला पत्रकार डब्बु क्षत्रीलाई प्रदान गरिने पनि उनले जानकारी गराए । नेपाली चलचित्र तथा गीत संगीतका विकाशमा पत्रकारिताबाट क्षत्रीले निरन्तर योगदान दिएका कारण उनलाई यो पुरस्कार प्रदान गर्न लागिएको पनि गुरुङले बताए । गत साल यो पुरस्कार पत्रकार तुलसी गिरी ‘ भावुक ’ लाई प्रदान गरिएको थियो ।
कोरोनाको महामारी पछि सुस्ताएको नेपाली गीत – संगीत तथा चलचित्र उधोगलाई माथि उठाउन २ वर्ष अघिबाट क्वालिटी इन्टरटेनमेन्ट अवार्डको आयोजना थालिएको हो । वि.सं. २०७८ बैशाखदेखि २०७९ भदौको पहिलो सातासम्म रिलिज भएका गीतहरुबाट उत्कृष्ट ५ को मनोनयन निर्णयक समितिले यस अघि नै नै छनौट गरेर सार्वजनिक गरिसकेको छ । ’ अध्यक्ष गुरुङले भने ।
